Apple asoschisi, marhum Stiv Jobs tomonidan Apple-1 kompyuteri uchun yon daftarchasi sahifasiga yozilgan reklama e’loni auksionda aqlbovar qilmas narx - 175759 dollarga sotildi. Bu varaq tarixdagi eng qimmat qog‘oz parchasiga aylandi.
Reklama 1976-yil mart oyida, Apple-1'ning rasman sotuvga chiqishidan bir necha oy oldin yozilgan. Apple bosh direktori yon daftari sahifasida kompyuterni "bir platada ishlovchi butun boshli tizim" deb ta’riflab, uning 8 KB tezkor xotiraga, ichki o‘rnatilgan klaviatura va televizorga ulash uchun videochiqishga egaligini sanab o‘tadi. Shundan keyin u matn ostiga o‘z imzosini qo‘yib, ota-onasining uy manzili va telefon raqamini qo‘shib qo‘yadi.
Ta’kidlanishicha, Jobs ushbu reklama qog‘ozini ikkita fotosurat qo‘shib do‘stiga beradi. Suratlardan birida Kaliforniyaning Mauntin-Vyu shahridagi Byte do‘koniga qo‘yilgan kompyuter, ikkinchisida esa monitor tasvirlangan. Keyinroq Interface jurnalining iyul sonida Jobsning yozuvlari va bergan suratlari asosida Apple-1 reklamasi chop etiladi.
Bu noyob qog‘oz shunchaki reklama bitilgan oddiy varaq bo‘lmay, Stiv Jobsning shaxsiy kompyuterlar rivojiga ko‘rsatgan ta’siri va qo‘shgan hissasining tarixiy ahamiyatidan dalolat hisoblanadi.
Bundan tashqari, ushbu varaqning 175000 dollardan oshiqroqqa sotilishi uning tarixiy ahamiyatga egaligini tasdiqlaydi. Vaholanki, kimoshdi savdolari oldidan qog‘oz egasi u uchun taxminan 30 ming dollar olishni kutgan. Bu qog‘oz parchasi yana ko‘p yillar davomida kolleksionerlar va tarixchilar tomonidan saqlanib, qadrlanib kelinadi.
