AQSH Mudofaa vazirligi avval noma’lum uchar jismlar (NUJ) nomi bilan ma’lum bo‘lgan noma’lum havo hodisalari (NHH) haqidagi maxfiy ma’lumotlarni ommaga taqdim etish uchun mo‘ljallangan yangi veb-sayt ochdi.
Pentagon matbuot kotibi, harbiy-havo kuchlari brigada generali Patrik Rayderning so‘zlariga ko‘ra, sayt shaffoflikni ta’minlovchi platforma bo‘lib xizmat qilishi kerak.
Saytda NHH bilan bog‘liq oshkor qilingan foto- va videomateriallar, NHH bilan bog‘liq ruxsat etilgan ma’lumotlar joylashtiriladi. Shuningdek, harbiylarga, hukumat xodimlariga va NHH bilan bog‘liq dasturlar haqida ma’lumotga ega pudratchilarga hisobotlar taqdim etishga imkon beruvchi yangi axborotlarni berish rejalashtirilgan.
Hozirda saytda mas’ul byuroning vazifalari va konsepsiyasi, harbiylarning NHH bilan to‘qnashuvlari haqidagi videomateriallar, shuningdek, NHH yo‘nalishidagi tendensiyalar haqida shu kungacha oshkor qilingan ma’lumotlar mavjud.
NHH deganda havo, dengiz va koinot kabi turli muhitlarda aniqlangan va tanilishi oson bo‘lmagan noma’lum obyektlar tushuniladi. 2022-yil avgust holatiga ko‘ra, so‘nggi 17 yil ichida 500 dan ortiq NHH aniqlanishi holatlari qayd etilgan.
