Shveysariyada poyezdda 2019-yilda topilgan 120 ta oltin quyma Xalqaro Qizil xoch qo‘mitasiga topshiriladi. Bu haqda Lyutsern shahri prokuraturasi xabar berdi.
Prokuratura quymalarning asl egasi aniqlanmagani, oltinlar esa hech bir jinoyatga aloqasi yo‘qligini ma’lum qilgan.
Qimmatbaho metallar oq rangli paket ichida topilgan. Paketda esa uning oluvchisi sifatida Xalqaro Qizil xoch qo‘mitasi (XQXQ) ko‘rsatilgan. Shu sababli, prokuraturada ta’kidlanganidek, "noma’lum kishi oltinni ushbu tashkilotga o‘tkazmoqchi bo‘lgan, deb taxmin qilish mumkin".
Natijada, quymalarni uning “oluvchisi” sifatida ko‘rsatilgan XQXQga topshirishga qaror qilingan.
Qo‘mita vakillari tashkilot faoliyatiga qo‘shilgan ushbu “hissa” uchun minnatdorchilik bildirishgan. U urushlar va zo‘ravonliklardan jabr ko‘rgan odamlarga yordam sifatida yuboriladi. Shu bilan birga, tashkilotda hali ham "xayriyaning an’anaviy usullari"ni afzal ko‘rishlari ta’kidlab o‘tilgan.
120 ta oltin quyma (umumiy og‘irligi 3,732 kg) solingan paket 2019-yil oktabr oyida Sankt-Gallendan Lyutsernga qatnovchi poyezd kuzatuvchisi tomonidan topilgan. Paketda qimmatbaho narsalar oluvchisi sifatida XQXQ ko‘rsatilgan. Quymalarda logotiplar va seriya raqamlari ham bo‘lgan.
Holat yuzasidan olib borilgan tergov natija bermagan, oltin quymalarning egasi topilmagan. Politsiya ham oltinlar bilan bog‘liq biror jinoyat sodir etilganini aniqlay olmagan va shu sababli ish yopilgan.
2023-yil bahorida Qizil xoch moliyalashtirilishi qisqartirilgan va u 1,8 mingga yaqin xodimini qisqartirishi hamda 350 ta ofisdan 26 tasini yopishini e’lon qilgan.
1866-yilda tashkil etilgan XQXK butun dunyo bo‘ylab mojarolar va qurolli zo‘ravonliklardan jabrlanganlarga yordam berish bilan shug‘ullanib keladi. Tashkilot bosh qarorgohi Jenevada joylashgan.
