Rossiyalik fazogirlar Dmitriy Petelin va Sergey Prokopyev amerikalik astronavt Frenk Rubio bilan birgalikda Xalqaro koinot stansiyasida (XKS) qolish bo‘yicha rekord o‘rnatishga muvaffaq bo‘lishdi.
Fazogirlar Pyotr Dubrovning 2021-yilning aprelidan 2022-yilning martigacha XKS dasturi bo‘yicha 355 kun 3 soat 45 daqiqa 21 soniya davom etgan rekord parvozini ortda qoldirishdi.
Prokopyev, Petelin va Rubio XKSga 2022-yil 21-sentabrda “Soyuz MS-22” fazoviy kemasida yetib kelishgan. Dastlab ularning ekspeditsiyasi 188 kun davom etishi rejalashtirilgan edi. Biroq, 2022-yil dekabr oyida kemaning sovutish tizimida nosozlik yuz bergan. Shu sababli ekipajni ortga qaytarishning iloji bo‘lmagan va missiyani yana bir necha oyga uzaytirishga qaror qilingan. Missiya joriy yilning 27-sentabriga qadar davom etadi. Fazogirlarni uchuvchisiz rejimda qaytarish uchun orbitaga “Soyuz MS-23” kemasi uchirildi.
Umuman olganda, eng uzoq fazoviy parvozni boshqa bir rossiyalik fazogir Valeriy Polyakov amalga oshirgan. 437 kun 17 soat 58 daqiqa 17 soniya davom etgan rekord parvoz “Mir” stansiyasida o‘rnatilgan.
30-may kuni Xitoyning “Shenchjou-16” fazoviy kemasi uchirilganidan so‘ng Yer orbitasida bir vaqtning o‘zida bo‘lgan fazogirlar soni bo‘yicha rekord o‘rnatildi – ular soni jami 17 nafarga yetgan. Avvalgi rekord 2021-yil 16-sentabrda o‘rnatilgan bo‘lib, o‘shanda orbitada bir vaqtning o‘zida 14 fazogir harakatlangan.
Eslatib o‘tamiz, XKS eskirib borayotgani sababli 2030-2031-yillarda orbitadan chiqariladi. AQSHning NASA agentligi rahbari Bill Nelsonning ta’kidlashicha, kelajakda past orbitadagi ishlarni xususiy tijoriy stansiyalarda olib borish rejalashtirilgan.
