Janubiy Koreyada yo‘lovchilar va ularning qo‘l yuklarining standart og‘irligini besh yilda kamida bir marta aniqlash haqidagi hukumat qarorini bajarish maqsadida, mamlakatning eng yirik aviakompaniyasi Korean Air o‘z mijozlarini yaqin kunlarda bunday vazn o‘lchash ishlari boshlanishidan xabardor qildi.
Yo‘lovchilar vaznini o‘lchash 28 avgustdan 6 sentabrgacha Kimpxo aeroportidan amalga oshiriladigan ichki reyslar, 8-19 sentyabr kunlari esa Seuldagi Inchxon aeroportidan bajariladigan xalqaro reyslar oldidan amalga oshiriladi.
Korean Air'ga boshqa koreys aviakompaniyalari ham qo‘shilishi mumkin, chunki Janubiy Koreyaning yer, infratuzilma va transport vazirligi birgina kompaniya ma’lumotlariga tayanib qolmoqchi emas.
Yo‘lovchilarga to‘liq maxfiylik va’da qilinayotganiga qaramay, ulardan bu borada salbiy fikrlar bildirildi. Taroziga turishni rad etish ham mumkin – buning uchun aeroport xodimlariga protseduradan o‘tishni istamasligingizni aytish kifoya. Ortiqcha vaznli odamlarga xavotirga o‘rin yo‘qligi aytilgan - ular uchun chiptalar narxi oshirilmaydi.
Ma’lumotlarga ko‘ra, joriy yilning may oyi oxirida Air New Zealand aviakompaniyasi o‘z tashabbusi bilan shunga o‘xshash tajribani o‘tkazgani matbuotda ma’lum qilingan. Shuningdek, Hawaii an Airlines va Finnair aviakompaniyalari ham bir necha yil oldin shunday ishlarni amalga oshirgan.
Bunday chora-tadbirlardan ko‘zlangan asosiy maqsad hozirgi zamon sharoitlariga muvofiq samolyotning uchish og‘irligini to‘g‘ri hisoblashdan iborat: aksariyat hollarda uchuvchilar hali ham 20-30 yil oldin qabul qilingan va ancha eskirishga ulgurgan yo‘lovchi vazni ko‘rsatkichlaridan foydalanishadi. Ammo ikki yil oldinoq aviatsiya sanoati vakillari so‘nggi vaqtlarda bu ko‘rsatkichlar kamida 5-10% ga oshganidan ogohlantirishgan.
AQSHning aviatsiya federal boshqarmasi samolyotlar uchish og‘irligini hisoblashda yo‘lovchilar vazni uchun quyidagi ko‘rsatkichlardan foydalanishni tavsiya qiladi - katta yoshli erkaklar vazni o‘rtacha 88,4 kg, katta yoshli ayollarnikini esa 70,3 kg. Janubiy Koreyada esa bugungi kunda bu ko‘rsatkichlar kichikroq bo‘lib, mos ravishda 81 kg va 69 kg.ni tashkil qiladi.
