Yovvoyi tabiatda birinchi marta dog‘i bo‘lmagan jirafa aniqlandi

Namibiyadagi Okonyati qo‘riqxonasida Jirafalarni muhofaza qilish jamg‘armasi (Giraffe Conservation Foundation) xodimlari Angola jirafasini noodatiy ko‘rinishdagi bolasi bilan birga kuzatishdi. Ajablanarlisi, kichik jirafaning tanasi bir xil rangda va bu turga xos dog‘larsiz bo‘lgan. 

Jamg‘armada ta’kidlanishicha, ular bunday jirafani yovvoyi tabiatda ilk bor ko‘rishgan.

Dog‘siz jirafalar kam uchraydi. Okonyati qo‘riqxonasida bunday jirafa payqalgunga qadar, ular bor-yo‘g‘i ikki marta qayd qilingan: biri 1972-yilda Yaponiyadagi hayvonot bog‘da, ikkinchisi esa 2023-yilning iyul oyida AQSHdagi hayvonot bog‘ida uchragan.

Jirafalarning har xil turlarida rangi hamda dog‘lari yoki chiziqlari ko‘rinishida farq bo‘lsa-da, yuqorida keltirilgan kabi o‘zgarishlarning sababi ko‘pincha noma’lum bo‘lib qoladi.

Giraffe Conservation Foundation'da ta’kidlanishicha, jirafalarda dog‘larning yo‘qligi genetik mutatsiyalar bilan bog‘liq bo‘lishi mumkin, ammo batafsil genetik tahlilsiz bu shunchaki taxmin, xalos.