2023-yil iyul oyi insoniyat tarixidagi eng issiq oy sifatida tarixga muhrlandi. Bunday bayonotni Kopernik nomidagi Yevropa observatoriyasi mutaxassislari berishdi.
Ularning fikricha, rekord ko‘rsatkich iyunda ham qayd qilingan. Bu orada issiq havo Yevropaning bir nechta davlatini matonatga sinashda davom etmoqda. Vaziyat ko‘plab o‘rmon yong‘inlari bilan yanada murakkablashgan.
Issiq havodan jabr ko‘rayotgan shunday davlatlardan biri Ispaniya bo‘lib, u yerda asfalt issiqdan erimoqda. Sevilyada havo soyada 47 darajaga yetgan. Bunday yuqori haroratdan mamlakat tom ma’noda qaynamoqda.
Ispaniyaliklar havo chidab bo‘lmas darajada dimligi va juda issiqligidan shikoyat qilishmoqda. “Barcha joyda, hattoki yer ostidagi metroda ham issiq”, deb aytishmoqda ular.
Ta’kidlanishicha, shamol va bulutdan darak ham yo‘q. Issiqdan, ayniqsa, yirik shaharlar aholisi ko‘proq aziyat chekmoqda. Ular favvoralarda jon saqlashmoqda.
Ispaniya hukumati bunday qurg‘oqchil havo sababli suv iste’moliga cheklov kiritdi. Aholiga o‘z avtomobillarini yuvish va bog‘larini sug‘orish ta’qiqlab qo‘yildi.
Qo‘shni Portugaliyada havo biroz salqinroq bo‘lsa-da, u yerda ham odamlar issiqqa dosh bera olmayapti. Ular uchun yagona jon saqlash joyi plyajlar bo‘lib qolmoqda.
Ikki qo‘shni davlatda issiq harorat sababli o‘rmonlar yonmoqda. Minglab gektar yerlar o‘t ichida qolgan. Ehtiyot chorasi sifatida ko‘plab aholi punktlari aholisi xavfsiz joyga ko‘chirilgan. Yong‘inlar kuchli shamollar sababli jadal yoyilmoqda. Tabiiy ofat bilan kurashga maxsus aviatsiya ham jalb qilingan. Biroq o‘t o‘chiruvchilarning ta’kidlashicha, yong‘in bilan kurashga katta kuch tashlanganiga qaramay, uni bir necha kundan keyingina jilovlash mumkin bo‘ladi.
