Hindistonning xalqaro nomlanishi India Bharat deb o‘zgartirilishi mumkin.
Hindiston ommaviy axborot vositalarining xabar berishicha, mamlakat bosh vaziri Narendra Modi boshchiligidagi hukumat parlamentning 18–22-sentabr kunlari bo‘lib o‘tadigan navbatdan tashqari sessiyasiga mamlakat nomini Bharat deb o‘zgartirish to‘g‘risidagi rezolutsiyani ko‘rib chiqish uchun kiritishi mumkin.
«Bxaratiya djanata parti» partiyasi yetakchilari mamlakat nomini Bharat deb o‘zgartirishni qo‘llab-quvvatlashmoqda.
"Britaniyaliklar Bharat nomini Hindistonga o‘zgartirdilar. Konstitutsiyaning 1-bandida shunday deyilgan: "Hindiston, ya’ni Bharat". Mamlakatimiz ming yillar davomida Bharat nomi bilan ma’lum bo‘lgan. Bu mamlakatning qadimgi sanskrit matnlarida uchraydigan qadimiy nomi. “India” nomi mustamlakachilik vaqtida berilgan va shu sababli qullik ramzi hisoblanadi”, deb aytgan partiyadan deputat Rajya Sabha Naresh Bansal.
Ushbu ma’lumotni Hindiston prezidenti tomonidan G20 mamlakatlari rahbarlariga yuborilgan kechki ovqatga taklifnoma ham qisman tasdiqlaydi. Taklifnomada Hindiston prezidenti Bharat prezidenti deb ko‘rsatilgan. G20'ning navbatdagi sammiti sentabr oyi boshida Nyu-Dehlida bo‘lib o‘tadi.
Hindistonning Bharat deb yuritilishi Hindistonning amaldagi konstitutsiyasida ham uchraydi. Unda "Hindiston Bxarat deganidir" deb yozilgan. Bharat Hindistonning hindchadagi rasmiy nomi. U qadimgi hind qiroli Bharatning sanskrit nomidan kelib chiqqan bo‘lib, uning tarixi mashhur hind dostoni «Mahobharat»da bayon etilgan.
"Hindiston" so‘zi mamlakatga shimoli-g‘arbiy tomondan kirib kelgan yevropaliklar ko‘rgan Hind (Ind) daryosi nomidan kelib chiqqan. Hindlarning o‘zlari bu daryoni Sindhu deb atashadi.
Avvalroq Hindistonda bir nechta shaharga tarixiy nomlari qaytarilgan. 1995-yilda Bombey Mumbayga, 1996-yilda Madras Chennayga, 2001-yilda Kalkutta Kolkataga, 2014-yilda esa Allohobod Prayagraj deb qayta nomlangan.
