Amerikalik tadbirkor, SpaceX va Tesla kompaniyalari egasi Ilon Mask Rimda Meta rahbari Mark Sukerberg bilan jang o‘tkazilishiga Italiya rahbariyati bilan kelishib olganini ma’lum qildi.
“Men Italiya bosh vaziri va madaniyat vaziri bilan gaplashdim. Ular jang o‘tkazilishiga rozilik berishdi”, deb yozgan Mask X (avvalgi Twitter) ijtimoiy tarmog‘ida.
Jangni tashkil etish bilan ikki tadbirkor jamg‘armalari shug‘ullanadi. Antiqa bahslashuv Meta va X ijtimoiy tarmoqlari orqali jonli tarzda namoyish qilinadi.
“Kadrda hech qanday zamonaviy manzaralar bo‘lmaydi, barchasi qadimiy Rim fonida o‘tadi”, deb yozgan Mask.
Tesla va Facebook asoschilari anchadan beri turli masalalarda o‘zaro ziddiyatda ekani ma’lum. Avvalroq Mask Sukerbergni jangga chaqirgani ma’lum bo‘lgandi. Mark ham hech cho‘chimay, jangga rozilik bergan. Shundan keyin jamoatchilikda ikki tadbirkor o‘rtasidagi ziddiyat tobora avj olishi qiziqish uyg‘otgan, biroq ko‘p o‘tmay jang haqidagi gaplar “piar” deb baholanib, unga qiziqish so‘ngan.
Bu orada ikkala tadbirkor ham vaqtni behuda ketkazmay, tajribali yakkakurashchilar murabbiyligi ostida jangga tayyorgarlikni boshlab yuborishgan.
Biroq ba’zi odamlar milliarderlarning o‘zaro jang o‘tkazish niyatiga shubha bildirmoqda va buni ularning o‘z mahsulotlariga e’tiborni tortish maqsadidagi “piari” deb hisoblamoqda.
Iyul boshida Mask va Sukerberg aralash yakkakurash qoidalari bo‘yicha jang o‘tkazish borasida UFC prezidenti Dana Uayt bilan muhokama olib borayotgani ma’lum bo‘lgan. Uaytning aytishicha, jang ko‘rgazmali bo‘ladi va ikki raqib turli vazn toifasida bo‘lgani sababli o‘ta qiziq kechishi kutilmoqda.
AQSHning BetUS bukmekerlik kontorasi ma’lumotlariga ko‘ra, AQSHda Mask va Sukerberg jangiga stavkalar olina boshlangan. Ta’kidlanishicha, Mask jang favoriti hisoblanadi.
