Saudiya Arabistoni poytaxti Ar-Riyodda 10-13 sentyabr kunlari dunyodagi eng yirik ko‘chmas mulk ko‘rgazmasi Cityscape Global 2023 “Kelajak hayot” shiori ostida bo‘lib o‘tadi.
Ko‘rgazma uy-joy xaridorlari, ko‘chmas mulk bo‘yicha mutaxassislar, dizaynerlar, mahalliy va xalqaro ishlab chiqaruvchilarni bir joyga to‘playdi. U Ar-Riyod ko‘rgazma va anjumanlar markazida bo‘lib o‘tadi.
Ko‘rgazmaga 170 dan ortiq davlatdan tashrif buyuruvchilar ro‘yxatdan o‘tgan. Unga minglab xaridorlar va ko‘chmas mulk mutaxassislari, 350 dan ortiq eksponatni tomosha qilish uchun 2000 nafar sarmoyachi, o‘z fikr va tajribalari bilan o‘rtoqlashuvchi 250 dan ortiq mahalliy va xalqaro ma’ruzachi keladi.
Cityscape Global Saudiya qirolligining istiqbolli investitsiya imkoniyatlarini dunyoga ochish hamda NEOM kabi zamonaviy turar-joy va tijorat obyektlari va loyihalarini alohida ajratib ko‘rsatish maqsadida qirollik bo‘ylab amalga oshirilayotgan shov-shuvli va yirik loyihalarni bir joyda namoyish etadi.
Qirollikning munitsipal, qishloq va uy-joy qurilishi ishlari vaziri Majid Al-Hugayl tadbirning muhimligini ta’kidlab, shunday dedi: “Biz dunyodagi eng yirik ko‘chmas mulk ko‘rgazmasi bo‘lgan Cityscape Global 'ni qabul qilayotganimizdan bag‘oyat mamnunmiz. Ko‘rgazma doirasida Vision 2030 rahnamoligi ostida amalga oshirilayotgan eng muhim va yirik loyihalar, shuningdek, 24 ta davlatdan boshqa loyihalar ishtirok etadi. Biz sarmoyachilar, ishlab chiquvchilar va ixlosmandlarni ko‘rgazmada ishtirok etishga taklif etib qolamiz".
