AQSHning mashhur kinoyulduzlari, sobiq er-xotin Anjelina Joli va Bred Pitt ajrimi bo‘yicha sud jarayoni 7 yildan keyin yakunlandi. Bu haqda In Touch Weekly nashri xabar berdi.
Sud chiqargan qarorga ko‘ra, sobiq juftlikning 3 nafar balog‘atga yetmagan farzandi Joli bilan qoladi. Pitt esa farzandlari bilan belgilangan vaqtdagina ko‘risha olishi mumkin bo‘ladi. Umuman olganda, sobiq juftlikning 3 nafar o‘z farzandidan tashqari yana 3 nafar boqib olgan farzandi bor.
Bundan tashqari, aktyor sobiq xotiniga Fransiyada birgalikda sotib olingan vinochilik korxonasidagi ulush uchun 250 mln. dollar to‘laydi. Aynan shu mulk sababli mojaroli ajrim shunday uzoq vaqt cho‘zilib ketgan.
Yulduzli juftlik 2005-yilda uchrashishni boshlagan. Bir yil o‘tib Joli Pittdan homilador ekanini ma’lum qilgan. Aktyorlar umumiy farzandlari borligi va tinch-totuv yashab kelayotganiga qaramay, 2014-yildagina rasman nikohdan o‘tgan. Biroq 2 yil o‘tib, Joli ajrashishga ariza bergan. Aktrisaning bunday qarorga kelishiga Pittning mast holatda samolyotda unga va farzandlariga tahdid qilgani sabab bo‘lgan. Keyinroq aktrisa o‘z intervyularida turmush o‘rtog‘i spirtli ichimliklarga ruju qo‘ygani va tez-tez o‘zini tajovuzkorona tutishi borasida bir necha marta to‘xtalib o‘tgan.
