Ba’zan har kungi birxillikdan tanaffus qilish va biroz dam olish juda foydalidir. Shu maqsadda quyida biznes haqida siz bilmasligingiz mumkin bo‘lgan ba’zi qiziqarli faktlar keltirilgan.
1 . Tarixdagi birinchi reklama 1477-yilda Angliyada chop etilgan. Bu ibodat kitobining reklamasi bo‘lgan.
2. Dunyoga mashhur Max Factor kosmetik kompaniyasiga 1877-yilda Polshada tug‘ilgan Maksimilian Faktorovich ismli shaxs tomonidan asos solingan. U o‘zining birinchi do‘konini Ryazan shahrida ochgan, 1904-yilda esa AQSHga ko‘chib ketgan.
3. Dunyodagi eng yirik onlayn-do‘kon Amazon kuniga o‘rtacha 15 millionta mahsulot sotadi, bu soniyasiga 170 dan ortiq mahsulot sotish demakdir!
4. Microsoft kompaniyasi o‘z faoliyatining dastlabki yilida bor-yo‘g‘i 16500 dollar ishlab topgan. Korporatsiyaning 2021-yildagi daromadi esa 10 million marta ko‘proqni – 168 milliard dollarni tashkil qildi.
5. Bir kub metr yog‘ochdan qancha tish kavlagich yasash mumkinligini hech o‘ylab ko‘rganmisiz? Unda bilib qo‘ying, bir kub metr yog‘ochdan 500 mingtaga yaqin tish kavlagich yasash mumkin.
6. Hozir ham ishlaydigan dunyodagi eng qadimgi kitob do‘koni Lissabonda joylashgan. U Livraria Bertrand deb ataladi va 1732-yilda tashkil etilgan.
7. Toyota kompaniyasining bosh qarorgohi Toyota shahrida joylashgan, ammo brend uning nomi bilan atalmagan. Aksincha, Koromo shahri 1959-yilda jahonga mashhur avtomobil brendi sharafiga qayta nomlangan.
8. Hindistonda ekinlarga ba’zan Coca-Cola ichimligi bilan ishlov beriladi. U Kolorado qo‘ng‘izlarini a’lo darajada yo‘q qiladi va maxsus kimyoviy vositalarga qaraganda ancha arzonroqqa tushadi.
9. Genri Ford o‘z zavodidagi ta’mirlash brigadasiga ishlagani uchun emas, balki dam olgani uchun pul to‘lagan. Bu hiyla xodimlarni konveyerning maksimal to‘xtovsiz ishlashi uchun nosozliklarni imkon qadar tez va samarali bartaraf etishga undagan.
10. Injener, avtopoygachi va Chevrolet konserni asoschisi Lui Chevrolet kompaniyadagi ulushini sotib, yana bir qancha korxonalar tashkil qilgan. Biroq AQSHdagi Buyuk tushkunlik boshlanganidan ko‘p o‘tmay, Lui bankrot bo‘ladi. Shundan keyin u Detroytdagi Chevrolet zavodiga oddiy mexanik bo‘lib ishga kirishga majbur bo‘ladi va u yerda 1941-yilda qashshoqlikda vafot etadi.
11. Apple kompaniyasiga Stiv Jobs va Stiv Voznyak asos solgani barchaga ma’lum, lekin kompaniyaning 10 foiz ulushiga ega bo‘lgan Ronald Ueyn ismli uchinchi asoschi ham bo‘lganini hamma ham bilmaydi. Kompaniya o‘z faoliyatini boshlanganidan 20 kun o‘tgach, Ueyn o‘z ulushini Stivlarga 800 dollarga sotadi. Bir yil o‘tgach, Ueynga kompaniyaga kelajakda da’vo qilmasligi uchun yana 1500 dollar to‘lanadi. Bugungi kunda Ueynning ulushi 300 milliard dollardan oshgan bo‘lardi.
12. FedEx kompaniyasi faoliyatining dastlabki kunlarida uning asoschisi Frederik Smit ko‘plab qiyinchiliklarni yengib o‘tishiga to‘g‘ri kelgan. Jumladan, bir marta kompaniya yoqilg‘i uchun 24000 dollar to‘lashi kerak bo‘lgan, ammo kompaniya hisobida atigi 5000 dollar qolgan. Shunda Smit barcha pullarni olib, Las-Vegasga boradi va u yerda qarta o‘yinida 27000 dollar yutib oladi.
