Wealth-X tadqiqot kompaniyasi dunyoda boyligi 30 million dollardan oshuvchi insonlar haqidagi har yillik hisobotini e'lon qildi.
Kompaniya tadqiqotchilarining hisob-kitobiga ko‘ra, 2022-yilda so‘nggi yillarda birinchi marta dunyo bo‘ylab multimillionerlar, ya’ni boyligi 30 million dollardan oshuvchi odamlar soni kamaydi.
2022-yil oxirida dunyoda juda katta boylikka ega 395070 kishi bo‘lgan, bu 2021-yilga nisbatan 5,4 foizga kamroq. Ularning umumiy boyligi ham 5,5 foizga kamayib, 45,4 trillion dollarni tashkil qildi. Multimillionerlar soni 2018-yildan beri ilk bor kamaygan.
Hisobot mualliflarining ta’kidlashicha, "2022-yil juda o‘zgaruvchan bo‘lgani, xomashyo narxlarining keskin oshishi, Xitoyda COVID-ga qarshi lokdaunlar va butun dunyo bo‘ylab geosiyosiy keskinlikning kuchayishi bilan tavsiflanadi". Obligatsiyalar bozorida faollikning sezilarli pasayishi kuzatilgan. Bularning barchasi dunyoning barcha mintaqalarida multimillionerlar sonining qisqarishiga olib kelgan. Faqatgina Lotin Amerikasi va Yaqin Sharq bundan istisno bo‘ldi. Ushbu mintaqalarda multimillionerlar soni, mos ravishda, 11650 kishigacha (17,5 foizlik o‘sish) va 21640 kishigacha (15,7 foizk o‘sish) yetgan. Bu asosan, ushbu mintaqalarda joylashgan ko‘plab davlatlar faol ravishda sotadigan neft, gaz va boshqa xomashyolar narxining oshishi bilan bog‘langan.
Dunyodagi jami multimillionerlarning 36,2 foizi yashaydigan Shimoliy Amerikada ular soni 2022-yilda 4 foizga kamayib, 142990 kishini, Osiyoda 10,9 foizga qisqarib, 108370 kishini tashkil etgan. Yevropada multimillionerlar soni 7,1 foizga qisqarib, 100850 nafargacha kamayib ketgan.
Multimillioner soni bo‘yicha dunyoning birinchi o‘ntaligiga kiruvchi deyarli barcha mamlakatlarda ular soni kamaygan. Eng sezilarli pasayish Yaponiyada (21,9 foizga), Gonkongda (23 foizga) va Fransiyada (11,9 foizga) qayd etildi. Bu borada dunyoda 1-o‘rinni egallagan AQSHda multimillionerlar soni 2022-yilda 4,3 foizga kamayib, 129665 kishini tashkil etgan. Xitoyda (dunyoda 2-o‘rin) 7,1 foizga, ya’ni 47190 kishigacha, Germaniyada (dunyoda 3-o‘rin) esa 9,3 foizga, ya’ni 19590 kishigacha qisqargan.
2022-yilda multimillionerlar soni bo‘yicha yetakchi o‘nta davlatdan faqatgina Hindistonda ular soni 3,2 foizga ko‘payib, 8,8 ming nafarga yetdi. Ularning umumiy boyligi 1,144 trillion dollarni tashkil qilmoqda. Wealth-X mutaxassislari buni “Hindistonda infratuzilmani rivojlantirish bo‘yicha yirik loyihalar amalga oshirilayotgani, kuchli iste’molchilik talabi va iqtisodiyotga katta miqdorda sarmoya kiritilishi” bilan izohlashgan.
Dunyoda eng ko‘p multimillionerlar yashaydigan shaharlarga kelsak, hisobot mualliflarining qayd etishicha, ular soni sezilarli kamaygan bo‘lsa-da (23 foizlik qisqarish), Gonkong yil yakunida 1-o‘rinni saqlab qolgan. Ushbu shaharda 12615 multimillioner yashaydi. 2-o‘rinni 11845 nafar multimillioner bilan Nyu-York (2,3 foizlik o‘sish), 3-o‘rinni 6370 nafar multimillioner bilan London (6,5 foizlik qisqarish) egallagan. Shuningdek, yetakchi o‘ntalikka Los-Anjeles, San-Fransisko, Chikago, Singapur, Parij, Tokio va Vashington ham kirgan.
