Krossoverlar va yo‘ltanlamas avtomobillar muhim bosqichga erishdi: tarixda birinchi marta ular Yevropaga yetkazilgan jami yangi avtomobillarning yarmidan ko‘pini tashkil qildi. Ularning bozordagi ulushi 51 foizgacha oshdi.
Dataforce tadqiqot kompaniyasi tomonidan yig‘ilgan savdolar haqidagi ma’lumotlarga ko‘ra, ushbu turdagi mashinalarning 2023-yil birinchi yarmida Yevropaga yetkazilishi 2022-yilning shu davriga nisbatan 23 foizga oshib, 3,37 million donaga yetgan.
Bu borada Tesla Model Y yetakchi bo‘ldi, undan 138152 dona yetkazilgan. Bu o‘tgan yilning shu davriga nisbatan 207 foizga ko‘proqni tashkil qiladi. 100000 dan ortiq sotilgan yana bir model Volkswagen T-Roc bo‘lgan – undan 104465 dona (32 foizlik o‘sish) yetkazilgan. Toyota kompaniyasi Yaris Cross'dan Yevropada 96849 dona sotgan, bu 2022-yilga nisbatan 49 foizga ko‘p.
Kuchli o‘nlikka Volkswagen Tiguan, Dacia Duster, Hyundai Tucson, Peugeot 2008, Kia Sportage, Renault Captur va Ford Puma modellari ham kirgan. Umuman olganda, Yevropada kichik krossoverlar (1 133 822 dona) 2023-yilning birinchi yarmida eng ommabop bo‘lgan, undan keyin ixcham krossoverlar (999 568 dona) va kichik avtomobillar (913 571 dona) keladi.
Bu boshqa turdagi avtomobillar savdosi yaxshi bo‘lmaganini anglatmaydi, chunki Dacia Sandero xetchbegidan Yevropada 2023-yilning birinchi yarmida 124 190 dona sotilgan. Bundan tashqari, Opel Corsa, Peugeot 208 va Renault Clio modellaridan ham 100 mingdan ko‘proq sotilgan.
