15-avgust kuni Vetnamning elektr avtomobil ishlab chiqaruvchi kompaniyasi VinFast AQSHda ro‘yxatga olingan, xaridlarga ixtisoslashgan Black Spade Acquisition kompaniyasi bilan birlashgandan keyin AQSHning Nasdaq birjasidagi savdolarda ilk bor qatnashdi.
CNBC hisob-kitoblariga ko‘ra, bozordagi debyutdan keyin kompaniya narxi 85 milliard dollarga yetgan. Avvalroq kompaniya 23 milliard dollarga baholanayotgan edi.
Shu tariqa, Vetnam kompaniyasining bozor narxi BMW, Volkswagen, Ford va GM kabi dunyo avtogigantlari narxidan o‘tib ketdi.
Oxirgi ma’lumotlarga ko‘ra, BMW va Volkswagen narxi taxminan 69 milliard dollar, Ford'niki 48 milliard dollar va GM'niki 46 milliard dollarni tashkil qiladi.
Bozor kapitallashuvi bo‘yicha AQSHning elektrokarlar ishlab chiqaruvchi Tesla kompaniyasi hamon 739 milliard dollarlik qiymat bilan dunyodagi eng yirik avtomobil ishlab chiqaruvchisi bo‘lib turibdi, uning xitoylik raqobatchisi BYD esa 93 milliard dollarlik narx bilan 4-o‘rinni egallamoqda.
VinFast Vetnamning Vingroup konglomeratining avtomobil bo‘limi bo‘lib, 2017-yilda tashkil etilgan.
Kompaniya AQSHda kengayishda qiyinchiliklarga duch keldi, jumladan, u dasturiy ta’minotdagi muammo sababli birinchi amerikalik mijozlariga avtomobillarni yetkazib berishda kechikdi.
VinFast bevosita raqobatchilari bo‘lgan Tesla va BYD hamda boshqa kompaniyalar bilan AQSH bozorida raqobatlashish uchun Shimoliy Karolinada zavod qurmoqda. Kompaniya yangi korxona birinchi bosqichda yiliga 150 mingtagacha avtomobil ishlab chiqara olishi mumkinligini aytdi.
Zavod rejalashtirilganidan bir yil kechroq, ya’ni 2025-yilda ishga tushishi kutilmoqda.
VinFast AQSHning raqobat kuchli bo‘lgan bozorida yirik o‘yinchilar bilan qanday raqobatlashishni rejalashtirayotgani haqidagi savolga javoban, kompaniyada ushbu bozorda har bir ishlab chiqaruvchi uchun yetarlicha ulush borligi aytilgan.
“Butun dunyo, jumladan, AQSH ichki yonuv dvigatelli mashinalardan elektr transport vositalariga o‘tayotgan hozirgi sharoitda hamma uchun joy yetadi”, deyilgan kompaniyada.
