AQSHda noyob qog‘oz pul rekord narxga sotildi

1934-yilda bosilgan 10 000 dollarlik noyob qog‘oz pul AQSHda kimoshdi savdosida rekord narx – 480 000 dollarga sotildi. Banknotaning chiqarilganiga deyarli 90 yil bo‘lgan.

Qog‘oz pul Boston note deb nomlanib, unda Avraam Linkoln prezidentligi davrida moliya vaziri lavozimini egallagan Salmon Cheyz tasvirlangan.

AQSH moliya muzeyi ma’lumotlariga ko‘ra, 10 000 dollarlik banknota AQSHda muomalada bo‘lgan eng katta qiymatli qog‘oz pul hisoblanadi. AQSHda 100 dollarlik qog‘oz pul 1969- yildan eng katta qiymatli banknotaga aylangan, o‘shanda 500 dollar va undan katta qiymatdagi banknotalar foydalanilmaganligi sababli muomaladan chiqarilgan.

Heritage Auctions kimoshdi savdo uyining valutalar bo‘yicha vise-prezidenti Dastin Jonson yirik nominaldagi banknotalar kolleksionerlarda hamisha alohida qiziqish uyg‘otganini ta’kidlab o‘tgan.

Uning so‘zlariga ko‘ra, “rekordchi” banknota narx bo‘yicha “1934-yilda chiqarilgan 100000 dollarlik oltin sertifikat”dangina ortda qoladi.

Bungacha bu qiymatdagi qog‘oz pul uchun olingan eng  katta pul 384 ming dollarni tashkil etgan va u 2020-yil sentabr oyida sotilgan.