Xitoy poytaxti Pekindagi “Mehnatkashlar” stadioni boshqaruv kompaniyasi muxlislar uchun noodatiy lotereya o‘tkazmoqda. Lotereyaga argentinalik futbol yulduzi Lionel Messi iyun oyida Avstraliyaga qarshi o‘rtoqlik o‘yinida to‘p surgan maydonning maysasi qo‘yilgan.
Hozirda “yashil esdalik” uchun 4000 ga yaqin odam navbatga turgan, ular lotereyada ishtirok etish uchun ariza to‘ldirishgan. Lotereya tashkilotchilari tasodifiy tarzda 100 nafar g‘olibni tanlab oladi. G‘oliblar maysani birinchilardan bo‘lib taxminan 70 dollardan sotib olishga muvaffaq bo‘lishadi. Qolgan chim esa ijtimoiy tarmoqlarda sotuvga chiqariladi. Esdalikni muhrlangan shisha qutida 45 kun ichida yetkazib berish va’da qilingan.
E’tiborlisi, chim taniqli futbolchi uchun o‘yindagi muhim onlar yuz bergan joylardan olingan. Dastlab Messi o‘yinning 2-daqiqasida sensatsion tarzda hisobni ochgan va faoliyatidagi eng tezkor golni urgan joydagi chim, so‘ngra Avstraliya terma jamoasining uchta himoyachisi orasidan mohirona o‘tib ketgan joydagi chim kavlab olingan.
Biroq sotilayotgan chimning asosiy qismi hujumchi o‘yinning ko‘p qismini o‘tkazgan joydan olingan. Futbolchi muxlislari orasidagi ajiotajga qaramay, ba’zi xitoyliklar ushbu aksiyani "bema’nilik" deb atashmoqda. Foydalanuvchilardan biri hazilomuz tarzda tashkilotchilarga Messi nafas olgan havoni ham pullashni taklif qilgan.
Futbol maydonlarining chimini sotish holatlari 1990-yilgi jahon chempionati vaqtidan beri ma’lum. O‘shanda Gamburgdagi reklama agentligi direktori Xarald Pigall Germaniya terma jamoasi mundial finalida argentinaliklarni mag‘lub etgan Rim stadionidagi maysani sotib olgan va uni bo‘laklab, muxlislarga 306 000 dona chimdan birini sotib olishni taklif qilgan. Maysani "konservalangan" yoki keyinchalik uyda o‘stirish uchun barra holatda sotib olish mumkin bo‘lgan. Xaridorlarga esdalikka qo‘shib uning aslligini tasdiqlovchi sertifikat hamda yong‘in, o‘g‘rilik va bo‘laklanib ketishdan sug‘urta ham taqdim etilgan.
2013-yilda The Daily Mirror nashri futbol muxlislari orasidagi yangi tendensiya haqida ma’lum qilgandi. Unga ko‘ra, ayollar o‘zlarining juftlarini xursand qilish uchun mashhur ingliz klublari o‘ynagan stadionlardagi maysani sotib olishgan. Authentic Grass Sports firmasi “Manchester Yunayted”, “Arsenal”, “Chelsi” va boshqa jamoalarning yulduzlari to‘p surgan maydonlar maysasini taklif qilgan.
Bu orada, "Barselona" ispan klubi rahbariyati maysani qayta ishlashning yanada daromadli usulini o‘ylab topdi. Klub rahbarlari oxirgi mavsumda qo‘llangan maysazordan ikki mingga yaqin olmos olishni va zargarlik buyumlari kolleksiyasini yaratishni rejalashtirishmoqda. Qimmatbaho toshlar maysani karbonlashtirish natijasida hosil qilinadi va buning uchun bor-yog‘i bir hafta vaqt ketadi.
