Global isish Ispaniyada zaytun moyi o‘g‘irlanishi holatlarining ko‘payishiga olib keldi. Qurg‘oqchilik va hosilning kamayishi ushbu mahsulot narxining keskin oshishiga asosiy sabab bo‘ldi va buning natijasida o‘g‘irliklar ko‘payib ketdi.
So‘nggi yirik o‘g‘irliklardan biri 30 avgust kuni Kordova provinsiyasida sodir etilgan. O‘g‘rilar bir necha soat ichida mahalliy zavoddan 50 ming litr yuqori sifatli zaytun moyini o‘g‘irlab ketishgan. Jinoyat natijasida yetkazilgan zarar 500 ming yevroni tashkil etgan.
Zaytun moyi ishlab chiqaruvchilari xavfsizlikni kuchaytirish maqsadida o‘z korxonalariga yangi eshiklar o‘rnatishmoqda yoki qo‘riqchilarni yollash haqida o‘ylashmoqda.
Do‘konlarda zaytun moyi o‘g‘irlanishi holatlarining ko‘payishi va qalbaki mahsulotlarning sotilishi ekstremal ob-havo, narxlarning ko‘tarilishi va talabning pasayishi bilan kurashayotgan ishlab chiqaruvchilar uchun yana bir bosh og‘rig‘iga aylandi.
Qaqshatqich qurg‘oqchilik Ispaniyada 2022-2023 yillardagi mavsumda zaytun moyi ishlab chiqarilishini yarmiga qisqartirdi, Italiyadagi ishlab chiqarish muammolari esa butun dunyo bo‘ylab yetkazib berishlarga ta’sir qildi.
Bu Ispaniya janubida zaytun moyi narxlarining 2022-yil boshiga nisbatan ikki baravar oshib ketishiga olib keldi. OCU iste’molchilar uyushmasi ma’lumotlariga ko‘ra, iyul oyining o‘rtalaridan boshlab, Ispaniyadagi supermarketlarda bir shisha zaytun moyi narxi taxminan 15 foizga oshib ketgan.
