Amerikalik sarmoyador Uorren Baffet o‘ziga tegishli Berkshire Hathaway xoldingining qariyb 27 million dollarlik aksiyalarini noma’lum xayriya tashkilotiga xayriya qildi. Bu milliarderning o‘z boyligini tarqatish rejasidagi so‘nggi qadam bo‘ldi.
Berkshire AQSH qimmatli qog‘ozlar va birja komissiyasiga ariza berib, Baffetning A toifasidagi 50 ta aksiyani xayriya qilganini e’lon qildi.
Xayriya 15 avgust kuni aksiyalar narxi 538 107 dollar atrofida bo'lganda amalga oshirilgan.
Bu Baffetning Bill va Melinda Geyts jamg'armasiga hamda o‘zining oilasi tomonidan nazorat qilinadigan to‘rtta xayriya tashkilotiga xayriyalaridan alohida xayriya bo‘lgan. Ushbu tashkilotlar 2006-yildan beri sarmoyadordan 51 milliard dollardan ko‘proq pul olgan.
Baffet hanuzgacha Berkshire'ning 218237 dona A toifali aksiyalariga egalik qiladi, bu milliarder 1965-yildan beri boshqarib kelayotgan konglomerat aksiyalarining taxminan 15 foizini tashkil qiladi.
Forbes jurnali hozirda Baffetning boyligini 118,3 milliard dollarga baholamoqda. U bu ko‘rsatkich bo‘yicha dunyoning eng boy odamlari reytingida 5-o‘rinni egallamoqda.
30-avgustda 93 yoshini qarshilaydigan Baffet o‘z boyligining 99 foizdan ortig‘ini xayriya ishlariga yo‘naltirilishini aytgan.
Berkshire Hathaway bir necha o‘nlab korxonalarga, jumladan BNSF temir yo‘liga, Geico avtosug‘urtasi hamda ko‘plab energik, ishlab chiqarish va chakana savdo korxonalariga egalik qiladi
2023-yil 30iyun holatiga ko‘ra, xolding 353 milliard dollarlik aksiyalarga egalik qilmoqda, ularning yarmi Apple aksiyalaridir.
