Tesla Xitoyda o‘zining Model S va Model X avtomobillari narxini pasaytirishda davom etmoqda. Kompaniya o‘zining asosiy bozorlaridan biri bo‘lgan Xitoyda kuchayib borayotgan raqobat sharoitida shu yo‘l bilan savdo hajmini ko‘paytirishga intilmoqda.
Model X narxi hozirda Xitoyda 836 900 yuanni (114 677 dollar) tashkil qilmoqda. Bungacha mashinaning narxi 898 900 yuan bo‘lgan.
Model S narxi esa 808 900 yuandan 754 900 yuangacha tushirilgan.
Milliarder Ilon Mask boshqaradigan kompaniya shu hafta boshida ham Xitoyda o‘z modellari uchun narxlarni pasaytirgan edi.
Shuningdek, Tesla AQSHda Model S va Model X avtomobillarining arzonroq versiyalarini chiqardi, biroq bu modellarning dasturiy ta’minoti cheklangan.
Davom etayotgan chegirmalar investorlarda tashvish uyg‘otmoqda – ular marja yanada ko‘p tushishi mumkinligidan xavfsirashmoqda. Ushbu yangiliklar ortida kompaniya aksiyalari narxi 16 avgust kuni ertalabki savdolarda bir kun avvalgi 3 foizlik arzonlashuvdan keyin yana tushib ketgan.
Bundan tashqari, Tesla chegirmalari Xitoy bozorida «narx urushi»ga olib kelishi mumkin, bu esa kichikroq kompaniyalarga o‘z salbiy ta’sirini o‘tkazishi mumkin.
Avtomobillarga ixtisoslashgan konsalting kompaniyasi bosh direktori Maykl Danning aytishicha, AQSH kompaniyasi "Xitoy bozorida bugungi kundagi past talab sharoitida g‘alaba qozonishning eng yaxshi yo‘li bu uzoq muddat davomida narxlarning agressiv pasaytirilishidir" degan fikrda. Bu raqobatchilarga katta bosim o‘tkazishi mumkin.
“Xitoyliklarda narxlarning pasayishiga o‘z kuchlari bilan qarshi turishdan boshqa tanlov yo‘q, bu esa ularning daromadini yanada kamaytiradi. BYD marjasi hozir juda kichik, NIO, Li Auto va Xpeng esa bazo‘r jon saqlamoqda, biroq ular hozircha amallashmoqda», deb qo‘shimcha qilgan mutaxassis.
Xitoy yengil avtomobillar uyushmasi ma’lumotlariga ko‘ra, Tesla iyul oyida Xitoyda mahalliy korxonasida ishlab chiqarilgan 64 285 ta elektromobil sotgan, bu esa iyun oyiga nisbatan 31 foizga kamroqni tashkil qilgan.
