Sobiq tadbirkor Stretta Tavisin Tailandning yangi bosh vaziri bo‘ldi. Ilgari u mamlakatdagi ikkinchi yirik qurilish kompaniyasi Sansiri Plc. direktori lavozimini egallagan va siyosatda katta tajribaga ega bo‘lmagan.
Stretta mamlakatning 500 o‘rinli vakillar palatasi va 250 o‘rinli senatning qo‘shma majlisida 482 ovoz oldi. So‘ngra uning nomzodi Tailand qiroli tomonidan tasdiqlandi.
60 yoshli siyosatchi 15 yillik surgundan qaytgan sobiq bosh vazir Taksin Chinavat bilan bog‘liq bo‘lgan “Pxia Txai” partiyasining vakili hisoblanadi. Tavisinning o‘zini esa Chinavatning ishonchli odami deb atashadi.
Tavisin 2023yil aprel oyida Tailandning navbatdagi bosh vaziri etib tayinlanishi haqidagi taxminlar ortida Sansiri bosh direktori lavozimidan iste’foga chiqqan.
U parlamentdagi ovoz berishdan bir necha kun oldin X (ilgarigi Twitter) ijtimoiy tarmog‘idagi xabarida “mamlakat va iqtisodiyotni yaxshilashni istagani uchun saylovlarda qatnashayotganini” ta’kidlab o‘tgan.
“Mening dushmanlarim - qashshoqlik va odamlar o‘rtasidagi tengsizlikdir. Mening maqsadim - barcha tailandliklarning farovonligi», deya qo‘shimcha qilgan yangi bosh vazir.
E’tiborlisi, Tavisin saylov kampaniyasi davomida mamlakatning 16 yoshdan oshgan barcha fuqarolariga 10 000 bat (taxminan 300 dollar) qiymatida raqamli aktivlar yuborishga va’da bergan. Biroq, olingan pulni faqat yashash joyidan to‘rt kilometrgacha masofada sarflash mumkin bo‘ladi.
