Daniyaning ozish uchun Wegovy vositasini ishlab chiqqan farmatsevtika giganti Novo Nordisk hashamatli buyumlar ishlab chiqaruvchi LVMH konglomeratini «taxtdan chetlatib», Yevropadagi eng qimmat kompaniyaga aylandi.
Kompaniya Buyuk Britaniyada Wegovy'ni ishlab chiqarishni boshlagandan keyin uning aksiyalari qimmatlab ketgan.
4-sentabrdagi savdolar yakunida kompaniyaning birjadagi qiymati 428 milliard dollarni tashkil etgan.
Wegovy semirishga qarshi vosita bo‘lib, u odamlarda to‘qlik hissi paydo qiladi va natijada ular kamroq ovqat yeyishlari va vazn yo‘qotishlariga olib keladi.
Vosita foydalanuvchilari orasida Ilon Mask kabi taniqli shaxslar bor. Ammo mutaxassislar dori tez yechim bo‘lmasligi va sog‘lom ovqatlanish hamda jismoniy mashqlar o‘rnini bosa olmasligidan ogohlantirishgan.
Vositaning sinovlari davomida sinaluvchilar davolash to‘xtatilganidan so‘ng ko‘pincha yana vazn yig‘a boshlashgan.
Britaniyaning sog‘liqni saqlash milliy xizmati tavsiyalariga ko‘ra, bemorlar semaglutid moddasini o‘z ichiga olgan Wegovy'ni ancha ortiqcha vaznga va vazn bilan bog‘liq muammolarga ega bo‘lsalargina olishlari lozim.
Iqtisodiy hamkorlik va taraqqiyot tashkiloti ma’lumotlariga ko‘ra, Buyuk Britaniyada katta yoshlilarning deyarli har uchinchisi semizlikdan aziyat chekadi, bu Yevropadagi eng yuqori ko‘rsatkichdir.
Yaqinda o‘tkazilgan tadqiqot Wegovy insult va yurak xuruji xavfini ham kamaytirishini ko‘rsatgan.
Mutaxassislar vositani qo‘llash natijalari ancha sezilarligiga qaramasdan, chiqarilgan xulosalarni hali to‘liq tahlil qilish kerakligini aytishgan.
