Wildberries internet-do‘koni rahbari, 47 yoshli Tatyana Bakalchuk Forbes talqiniga ko‘ra, Rossiyaning eng boy ayoli deb tan olindi. U 2021-yilda ham bu borada yetakchi bo‘lgan. Ikki yil avval uning boyligi 13 milliard dollarga baholangan bo‘lsa, hozirda u 7 milliardga yaqinni tashkil qilmoqda.
Ishbilarmon ayolning ta’kidlashicha, u juda kamtarona yashaydi. Uning hashamatli kvartiralari ham, qimmatbaho mashinalari ham yo‘q, butun oilasi esa Wildberries'dan kiyim buyurtiradi. Bakalchuk oilasi katta bo‘lib, eri Vladislav va yettita farzandi, jumladan, 2021- yilda tug‘ilgan egizaklari bor.
Sobiq o‘qituvchi bo‘lgan Tatyana turmush o‘rtog‘i – moskvalik tadbirkor bilan o‘z biznesiga 2004-yilda asos solgan. O‘shanda ular o‘zlari kataloglardan tovarlar sotib olib, qayta sotishgan, kompaniyalarining birinchi xodimlari esa oila a’zolari bo‘lgan.
Endilikda Tatyananing eri Vladislav biznesning "matematikasi" uchun javobgardir.
Bakalchukning so‘zlariga ko‘ra, u hech qachon o‘z kompaniyasining iqtisodiy faoliyatini tahlil qilish bilan shug‘ullanmagan, chunki buni shaxmatchi-eri yaxshiroq uddalaydi.
Kompaniyaning jadal o‘sishi mojarolarsiz kechmadi. Kompaniyada qaytarilgan tovarlar uchun to‘lov joriy qilinishi mijozlarning noroziligiga sabab bo‘lgan. Ushbu chora 2021-yilda nopok yetkazib beruvchilarga qarshi kurashish va foydalanuvchilarni ongli tarzda xaridni amalga oshirishga undash maqsadida joriy etilgan. Bakalchuk "inson o‘nta yubka yoki o‘n juft poyabzalga buyurtma berishdan oldin biroz o‘ylab ko‘rishi" kerakligini aytadi. Biroq ikki yil o‘tgach, sud bu chorani noqonuniy deb topgan.
Wildberries kiyim-kechak, poyabzal, elektronika, bolalar buyumlari, uy-ro‘zg‘or buyumlari va hokazo bilan savdo qiluvchi onlayn-do‘kon bo‘lib, 2021-yilda kompaniya aylanmasi 844 milliard rublni tashkil etgan. Ayni vaqtda kompaniyada 20 mingga yaqin odam ishlaydi.
