Xitoyning Geely xoldingiga tegishli Zeekr elektromobillar brendi Zeekr 001 FR modelini taqdim etdi. Uning asosiy raqobatchisi Tesla Model S Plaid bo‘lishi aytilmoqda.
Zeekr brendi 2021-yilda tashkil etilgan va bugungi kunda Xitoy bozorida o‘sish bo‘yicha yetakchilardan biri hisoblanadi: 2023-yilning dastlabki uch choragida brend 66975 ta avtomobil sotishga muvaffaq bo‘lgan, bu 2022-yilning yanvar-avgust oylariga nisbatan 115 foizga ko‘proqni tashkil qilgan.
Model nomidagi FR harflari Future Roads, ya’ni "kelajak yo‘llari" degan ma’noni anglatadi.
Ikki motorli oddiy Zeekr 001 maksimal 544 ot kuchi bera olsa, uning FR versiyasida har bir g‘ildirakka bittadan elektr motor o‘rnatilgan va ularning jami kuchi 1265 ot kuchini tashkil qiladi. Tesla Model S Plaid'ning uch dvigatelli kuch qurilmasi esa "bor-yo‘g‘i" 1020 ot kuchiga ega.
Zeekr 001 FR 100 km/soat tezlikka 2,07 soniyada (Tesla Model S Plaid'da 2,1 soniya) erisha oladi, maksimal tezligi esa 285 km/soatni tashkil qiladi.
Sportkar tank kabi bir joyda turib o‘z o‘qi atrofida burila oladi.
Zeekr 001 FR tez quvvatlanadi. U 100 kilovatt-soat sig‘imga ega CATL Qilin akkumulatori bilan jihozlangan bo‘lib, u atigi 15 daqiqada 10 foizdan 80 foizgacha quvvatlanishi mumkin. Sportkar bir quvvatlanishda 600 km.dan ortiq yo‘l bosa oladi.
Bundan tashqari, Zeekr sun’iy yo‘ldosh aloqasi bilan ham jihozlangan. Ko‘rinishicha, bu mashina juda tez yurganda mobil aloqada uzilishlar bo‘lmasligi maqsadida qilingan.
Zeekr yangi modeldan oyiga atigi 99 dona ishlab chiqarishini ma’lum qilgan. Sportkarning narxi hozircha e’lon qilinmagan, ammo u bir million yuandan (138 000 dollar) oshishi aniq. Mashinaning yetkazib berilishi oktabr oyida boshlanadigan birinchi partiyasi buyurtirish bosqichida bor-yo‘g‘i 15 soniya ichida talab ketilgan.
