Apple kompaniyasi smartfonlari ishlashi sekinlashtirilgan iPhone foydalanuvchilariga tovon to‘lashni boshlaydi. Bu haqda The Mercury News nashri xabar berdi.
Nashrga ko‘ra, korporatsiya sud orqali smartfondagi muammolar haqida xabar qilgan qurilma egalarining har biriga 65 dollardan to‘laydi. Apple umumiy hisobda taxminan 500 million dollar tovon to‘laydi. Bu haqda korporatsiya huquqshunoslari va smartfon egalari 2020-yildayoq kelishib olgan.
AQSH brendi qurilmalari egalari kompaniyani eski smartfonlarni ataylab sekinlashtirganlikda ayblagan da’vo arizasi sudga 2017-yilda berilgan. Jami 3 millionga yaqin foydalanuvchi ushbu muammo yuzasidan sudga murojaat qilgan. Ma’lumki, eski akkumulyatorga ega ayfonlar sekinroq ishlashi mumkin bo‘lgan, biroq Apple o‘z gadjetlarining bu jihatini dastlab tan olmagan.
Da’vogarlar vakillarining so‘zlariga ko‘ra, iPhone 6, 6 Plus, 6s, 6s Plus, SE, 7 va 7 Plus smartfonlari egalari tovon puli oladi. Shu bilan birga, uni 2020-yilda ariza topshirgan va AQSHda qonuniy asosda yashovchi foydalanuvchilargina olishi mumkin.
Apple eskirgan batareyaga protsessor ko‘rsatadigan yuklamani kamaytirish uchun iPhone tezligini pasaytira boshlagan. Kompaniya kuchlanishdagi “o‘ynashlar” sababli qurilmaning o‘z-o‘zidan qayta yuklanishi muammosini shu tariqa hal qilmoqchi bo‘lgan.
2022-yil iyul oyida Apple klaviaturasi muammoli bo‘lgan MacBook egalariga 50 million dollar to‘lashi ma’lum bo‘lgandi. Kelishuv 2015-2019-yillar oralig‘ida MacBook, MacBook Air va MacBook Pro‘ning ko‘pgina modellarini sotib olgan mijozlarni qamrab olgan.
