Twitter kompaniyasining Twitter ijtimoiy tarmog‘idagi rasmiy akkaunti X deb qayta nomlandi.
Akkauntning ko‘k rangli qushcha tasvirlangan logotipi ham o‘zgartirilib, endilikda qora fondagi oq rangli X harfi ko‘rinishini oldi.
2022-yil 27-oktabrda amerikalik tadbirkor, Tesla va SpaceX kompaniyalari asoschisi Ilon Mask Twitter’ni 44 mlrd. dollarga sotib olgan edi.
Avvalroq Mask endilikda x.com domeni foydalanuvchilarni Twitter ijtimoiy tarmog‘iga qayta yo‘naltirishini ma’lum qilgan.
X’ning bosh direktori Linda Yakkarino CNBC telekanaliga bergan intervyusida Twitter nomidan voz kechilishining sababini tushuntirdi.
Kompaniyadagi faoliyatini joriy iyunda boshlagan Yakkarinoning ta’kidlashicha, Mask Twitter'ni sotib olgandan buyon uni qayta nomlash ustida ishlab kelgan.
“Ilon uzoq vaqtdan beri “barcha narsa” uchun dastur, X haqida gapirib kelayotgandi”, deb tushuntirgan Yakkarino.
Uning ta’kidlashicha, rebrending Twitter’dan haqiqiy xalos bo‘lishlikka olib keladi. “Bu bizga Twitter’dan meros qolgan fikrlashdan ketishga imkon berdi. Bu biz qanday jamlanishimiz, qanday ko‘ngilxushlik qilishimiz, bir platformada bitimlar amalga oshirishimizni o‘zgartiradi”, deb qo‘shimcha qilgan X bosh direktori.
Yakkarino X Corp. endilikda bir yil avvalgidan ko‘ra “ancha sog‘lom va xavfsiz platforma” ekanini ta’kidlab o‘tgan.
