Fransiyaning “Pari Sen-Jermen” klubi hujumchisi, braziliyalik Neymar yangi klubi – Saudiyaning “Al-Hilol” klubida qancha maosh olishi ma’lum bo‘ldi.
Avvalroq braziliyalik futbolchi Saudiya Arabistoni klubiga o‘tgani ma’lum bo‘lgandi. Neymar allaqachon “Al-Hilol” bilan shartnoma imzolab, tez orada tibbiy ko‘rikdan o‘tishi xabar qilingandi.
Sky Sports ma’lumotlariga ko‘ra, futbolchining yangi klubdagi maoshi yiliga 150 million yevroni tashkil qiladi – bu uning “PSJ”da olgan maoshidan 6 karra ko‘proqdir. Parij klubining o‘zi esa transfer uchun 100 million yevro qo‘lga kiritadi.
Neymar 2017-yildan beri “PSJ” uchun to‘p surib kelgan. Futbolchining klub bilan shartnomasi 2025-yilgacha mo‘ljallangandi. 2022/23 yilgi mavsumda 31 yoshli braziliyalik parijliklar safida barcha musobaqalarda 29 ta o‘yinda ishtirok etib, 18 ta gol va 16 ta golli uzatma muallifiga aylangan.
Jahon futboli yulduzlari so‘nggi vaqtda Saudiya klublariga faol tarzda o‘tmoqda. Bunday transferlar ichida eng shov-shuvlisi portugaliyalik super hujumchi Krishtianu Ronalduning 2022-yil oxirida “Al-Nasr” klubiga o‘tishi bo‘ldi. Qayd etilishicha, futbolchining klubdagi yillik daromadi reklama shartnomalaridan tushadigan pullarni hisobga olganda yiliga 200 million yevrodan oshadi.
