Amerikalik tadbirkor Ilon Maskning Tesla avtomobilsozlik kompaniyasi yiliga 20 millionta elektromobil ishlab chiqarish maqsadiga erishish uchun yana yettita yangi zavod ochishi kerak. Kompaniya Meksikada qurilayotgan zavoddan tashqari, Kanada, Hindiston va Fransiyada ham zavodlar qurish imkonini o‘rgangan. Yaqinda zavodlar qurilishi mumkin bo‘lgan yana ikkita variant haqida ma’lum bo‘ldi, bular: Saudiya Arabistoni va Turkiya. Biroq Mask ushbu davlatlardan faqat bittasini rad etgan.
Wall Street Journal nashrining yozishicha, Tesla va Saudiya Arabistoni elektromobil zavodi qurish bo‘yicha dastlabki muzokaralarni boshlagan.
Avval Saudiya Arabistoni Lucid Motors elektromobil startapiga sarmoya kiritib, qirollikda uning zavodini qurish bo‘yicha kelishuvga erishgan. Nashrning ta’kidlashicha, endi esa Tesla'ni taklif qilish navbati kelgan, garchi 2018-yilda Ilon Mask kompaniyani xususiylashtirish uchun Saudiya Arabistonidan pul olishdan bosh tortgan.
Biroq Maskning o‘zi keyinroq bu mish-mishlar haqiqatga to‘g‘ri kelmasligini ma’lum qildi. "WSJ yana butunlay yolg‘on maqola yozdi", deb aytgan tadbirkor. Ammo Turkiya prezidenti bilan bunday muzokaralar bo‘lgani bo‘yicha Mask tomonidan raddiya bo‘lmagan.
Yaqinda Turkiya prezidenti Rajab Toyyib Erdo‘g‘an va Ilon Mask Nyu-Yorkda uchrashib, bir qator mavzularni, birinchi navbatda, Turkiyada Tesla zavodining paydo bo‘lishini muhokama qilishgan.
“Ko‘plab turk kompaniyalari allaqachon Tesla bilan ishlamoqda va Turkiya yangi zavodning joylashuvi uchun eng muhim nomzodlar orasida”, deya Maskning so‘zlarini keltirib o‘tgan Erdo‘g‘anning matbuot xizmati.
Hozircha Tesla elektromobillari Turkiyada rasman sotilmaydi. Xizmat ko‘rsatish yo‘qligi va ehtiyot qismlarni import qilish zarurligiga qaramay, Turkiyada Tesla'ning turli modellariga ega odamlar talaygina topiladi. Ular ko‘p yillardan buyon kompaniyadan Turkiyada xizmat ko‘rsatish markazlarini ochishni iltimos qilib kelishadi.
