SpaceX korporatsiyasi Yevropada birinchi ofisini ochmoqchi

Amerikalik tadbirkor Ilon Maskning SpaceX korporatsiyasi Dublinda o‘zining Yevropadagi birinchi ofisini ochishni rejalashtirmoqda. Bu Starlink sun’iy yo‘ldosh aloqa xizmati savdosini oshirish maqsadida amalga oshiriladi.

Korporatsiyaning yangi bo‘limi butun Yevropada Starlink operatsiyalarini qo‘llab-quvvatlash bilan shug‘ullanadi.

Hozirgi vaqtda provayder 60 dan ortiq mamlakatda internetga yuqori tezlikda ulanishni ta’minlaydi. U jahon tarmog‘i ishonchsiz, qimmat yoki umuman imkonsiz bo‘lgan hududlarga alohida e’tibor qaratadi.

Starlink tarmog‘i sayyoramizning istalgan nuqtasidan soniyasiga 1 gigabit tezlikda internetga ulanishni ta’minlash uchun mo‘ljallangan. Bu tezlik 5G standartiga mos keladi. Kompaniya shu maqsadda orbitaga 4,5 mingdan ortiq kichik o‘lchamli yo‘ldoshni yetkazgan. Hozirda 4,1 mingga yaqin sun’iy yo‘ldosh ishchi holatda, qolganlari esa texnik sabablarga ko‘ra ishlamay qolgan yoki orbitadan chiqib ketgan. SpaceX hisob-kitoblariga ko‘ra, loyiha doirasida jami 11 mingta sun’iy yo‘ldoshni orbitaga uchirish va ularni ishga tushirish 10 milliard dollarga aylanadi.