Xitoy hukumati yarimo‘tkazgich sanoatini rivojlantirish uchun 41 milliard dollarlik yangi investitsiyaviy jamg‘arma tashkil etadi. Ushbu jamg‘armadan subsidiya oluvchilar nafaqat sanksiyalardan omon qolishlari, balki xorijiy raqobatchilar bilan qiyoslasa bo‘ladigan texnologik rivojlanish darajasiga erishishi kerak.
Qayd etilishicha, yangi jamg‘arma tomonidan boshqariladigan mablag‘lar xuddi shunday maqsadda yaratilgan avvalgi ikkita jamg‘armaning umumiy mablag‘laridan oshadi. Birinchi jamg‘arma 2014-yilda taxminan 19 milliard dollar bilan tashkil etilgan bo‘lsa, ikkinchi jamg‘arma 2019-yilda 27 milliard dollar olgan.
Xitoy moliya vazirligining yangi jamg‘armaga qo‘shadigan ulushi taxminan 8,2 milliard dollarni tashkil qilishi mumkin.
Yillar davomida Xitoyning integral mikrosxemalar sanoati investitsiyaviy jamg‘armasi mamlakatning ikkita eng yirik chip ishlab chiqaruvchi zavodini, flesh-xotira ishlab chiqaruvchi kompaniyani va boshqa bir qator kichik kompaniyalar hamda jamg‘armalarni moliyalashtirgan.
Ushbu jamg‘arma yordamida Pekin AQSH Xitoyga qarshi boshlagan e’lon qilinmagan texnologik urushni boy bermaslikka umid qilmoqda.
2022-yilda AQSH Xitoyga zamonaviy yarimo‘tkazgichlar ishlab chiqarish uchun uskunalar sotishni taqiqlovchi sanksiyalar paketini kiritgan. Vashington Xitoyga qarshi texnologik urushga Niderlandiya va Yaponiyani ham chorlagan. Ushbu davlatlar ham Xitoyga qarshi AQSH kabi sanksiyalar va cheklovlarni joriy qilgan.
Xitoy Prezidenti Si Szinpin ko‘p yillar davomida Xitoy milliy xavfsizlikni ta’minlovchi va uni xorijiy ishlab chiqaruvchilardan to‘liq mustaqil qiluvchi o‘z yarimo‘tkazgich sanoatiga muhtojligini ta’kidlab kelgan.
