Johnson & Johnson kompaniyasi o‘zining 135 yildan beri ishlatib kelinayotgan, bir zumda taniluvchi logotipini o‘zgartirmoqda.
Logotipda kompaniya asoschilaridan biri Jeyms Vud Jonson imzosiga asoslangan kursiv shaklidagi shrift o‘rniga kompaniya tarkibidan yaqinda ajrab chiqqan hamda tibbiy uskunalar va dori vositalari ishlab chiqarishga ixtisoslashgan yangi kompaniyaga xos tarzda tikka shriftda yozilgan nom paydo bo‘ldi.
Kompaniya bayonotida yangi logotip "hayratlanish va insoniylik tuyg‘usini bildirishi" aytilgan. Ta’kidlanishicha, qizil rang kompaniya uchun asosiy rang bo‘lib qoladi, chunki u “sog‘liq bilan bog‘liq muammolarga zudlik bilan javob berish, zamon bilan hamnafas bo‘lish va jadallikni belgilay olish qobiliyatidan darak beruvchi zamonaviy rang” hisoblanadi.
Bu katta o‘zgarish bo‘lsa-da, iste’molchilar buni uncha sezmaydilar, chunki kursiv yozuvli logotip kompaniyaning Band-Aid va Tylenol kabi mahsulotlarida saqlanib qoladi. Eslatib o‘tamiz, Johnson & Johnson yaqinda ikkita kompaniyaga bo‘lindi: biri tibbiy uskunalar va dori-darmonlarga, ikkinchisi esa Kenvue brendi ostida ishlovchi va salomatlik tovarlari ishlab chiqarishga ixtisoslashgan.
Kompaniyaning ko‘p yillik logotipidan voz kechishi butun boshli davrining tugashini anglatadi, chunki kompaniyada bir vaqtlar ushbu logotip "dunyodagi eng eski kompaniya logotiplaridan biri" ekanligi ta’kidlangandi. Yangi logotip sekin-asta Johnson & Johnson'ning tibbiy uskunalar va farmatsevtika mahsulotlarida paydo bo‘la boshlaydi.
