Britaniyaning Janus Henderson Investors guruhi tadqiqotiga ko‘ra, 2023-yilning 2-choragida dunyoning eng yirik kompaniyalari tomonidan to‘langan dividendlarning umumiy qiymati yillik hisobda 4,9 foizga oshib, 568 milliard dollarga yetdi.
Bu rekord ko‘rsatkich, ammo AQSHda uning o‘sish sur’ati ketma-ket oltinchi chorak sekinlashmoqda.
Dunyoda iqtisodiy faollik sustlashishi kutilayotganiga qaramay, Janus Henderson mutaxassislari butun 2023-yil uchun dividendlar bo‘yicha prognozlarini 1,64 trillion dollar darajasida saqlab qolishdi, bu ham rekord ko‘rsatkich bo‘ladi. Bu qiymat 2022-yilgi ko‘rsatkichdan 5 foiz ko‘proqni tashkil qiladi.
Aprel-iyun oylarida AQSHda dividendlar to‘lovi 148 milliard dollarni tashkil etgan va 2022- yilning shu davriga nisbatan 2,6 foizga o‘sgan. Intel Corp. va Blackstone kompaniyalari dividendlar miqdorini eng ko‘p qisqartirgan.
Yevropada dividendlar to‘lovi 9,7 foizga oshib, 184,5 mlrd dollarni, Osiyo-Tinch okeani mintaqasida esa 78,3 mlrd dollarni tashkil qilgan.
Shveysariyaning Nestle kompaniyasi 2-chorakda dividendlarga yo‘naltirilgan mablag‘lar hajmi bo‘yicha jahon yetakchisi bo‘ldi, undan keyingi o‘rinlarni HSBC, Mercedes-Benz, China Mobile, Bayerische Motoren Werke AG, BNP Paribas, Microsoft Corp., Allianz, Sanofi va Axa kompaniyalari egallagan. Ushbu kompaniyalar to‘lagan jami dividendlar 57,5 mlrd dollarni tashkil etgan, bu esa dunyo bo‘yicha jami dividendlar summasining 10 foizdan ko‘prog‘ini tashkil etadi.
Janus Henderson'ning global dividend to‘lovlaridagi o‘zgarishlarni tahlil qiluvchi choraklik tadqiqoti dunyoning bozor qiymati eng yirik 1200 ta kompaniyasi ma’lumotlarini hisobga oladi va 2009-yildan beri olib boriladi.
