Yaqinda Berlinda o‘tgan ayollar marafonida efiopiyalik Tigist Assefa yangi jahon rekordini o‘rnatdi. O‘shanda uning oyog‘ida bo‘lgan Adidas krossovkalari sotuvga chiqarildi.
Narxi 500 dollar bo‘lgan Adizero Adios Pro Evo 1 krossovkalari o‘z muqobili Nike Alphafly 2 krossovkalaridan 225 dollar qimmatroq turadi. Bu esa qimmat krossovka uchun qo‘shimcha haq to‘lashga tayyor qancha havaskor yuguruvchilar topilishi borasida savol tug‘diradi.
Oyoq kiyimining og‘irligi bor-yo‘g‘i 138 gramm bo‘lib, u chidamli emas. U bitta marafon masofasiga yugurish (42 kilometr) va poyga oldidan isinish uchun mo‘ljallangan, xalos. Adidas'da ta’kidlanishicha, yuguruvchilar har bir marafon uchun yangi juftlik sotib olishlari kerak bo‘lsa, unda har bir bosib o‘tilgan kilometr taxminan 12 dollarga tushadi. Kompaniya o‘z krossovkalarini "jahon rekordchilariniki" deb reklama qilmoqda.
26 sentabr kuni atigi 521 dona krossovka sotuvga chiqarilgan, keyingi partiya noyabr oyidagina sotuvga chiqarilishi rejalashtirilgan.
Efiopiyalik yuguruvchi Tigist Assefa Berlin marafonida g‘alaba qozonib, avvalgi jahon rekordini ikki daqiqadan ko‘proq vaqtga yangiladi. Assefa 42 km 195 m masofani 2 soat 11 daqiqa 53 soniyada bosib o‘tdi. Avvalgi rekord keniyalik Bridjit Kosgeyga (2 soat 14 daqiqa 4 soniya) tegishli bo‘lib, 2019-yilda Chikagoda (AQSH) o‘rnatilgan edi.
