Xitoyning BYD avtogiganti 2023-yil iyul oyida gibrid elektromobillar sotish bo‘yicha o‘z rekordini yangiladi: kompaniyaning yoz o‘rtasidagi oylik savdo hajmi 261,1 mingta elektrokarga yetgan. Bu kompaniyaning bir yil avvalgi savdo ko‘rsatkichiga nisbatan 61 foiz, iyun oyidagi ko‘rsatkichiga nisbatan esa deyarli 10 mingta ko‘proq elektrokarni tashkil qiladi. Joriy iyunda BYD 251,7 mingta gibrid mashina sotishga muvaffaq bo‘lgan.
Gizmochina nashrining xabar berishicha, sotilgan gibrid modellar orasida 134,8 mingtadan ko‘prog‘ini akkumulatorli elektromobillar (BEV), 126,3 mingtadan ko‘prog‘ini zaryadlanuvchi elektromobillar (PHEV), 11 mingtadan oshiqrog‘ini luks sinfidagi Denza hamda Song va Qin modellari tashkil qilgan.
Bundan tashqari, BYD Dolphin modeli ham ancha ommalashib, uning oylik savdosi hajmi deyarli 32 mingtani tashkil qilgan. To‘liq elektrlashgan Yuan oilasiga tegishli modellar savdosi ham Dolphin’nikidan qolishmagan.
Seagull elektr mikroavtobusi savdosi esa iyul oyida 28 mingtani tashkil qilgan.
Hisobotlarga ko‘ra, Xitoy kompaniyasining joriy yildagi gibrid elektromobillar savdosi yil oxiriga kelib 3 mln.tagacha yetadi.
Yuqoridagi ijobiy raqamlarga qaramay, avtomobillar bozori tahlilchilarining ta’kidlashicha, BYD’ning 2022-yil iyulidan 2023-yil iyuligacha savdosi o‘sishi foiz nisbatida 2020-yil oxiridan beri eng susti hisoblanadi.
