AQSHning Burger King ovqatlanish tarmog‘i mijozlarni aldaganlikda ayblanmoqda. Mayami okrug sudi kompaniyani o‘z burgerlari hajmini aslidagidan katta qilib ko‘rsatganlikda ayblayotgan bir necha kishining jamoaviy da’vosini qanoatlantirdi.
Da’vodan ma’lum bo‘lishicha, tarmoqning taomnomasidagi suratlarda gamburgerlar mazaliroq va aslidagidan deyarli 30 foizga, kotletlari esa 2 baravar kattaroq tasvirlangan. Bu esa haqiqatda ancha kichik gamburgerlarni olgan mijozlarni ranjitgan.
Arzchilarning aytishicha, ular aslida o‘zlarini nima kutayotganini bilganlarida, bunday mahsulotlarga pul sarflamagan bo‘lardilar. Arznomani imzolagan besh iste’molchining har biri ko‘rilgan zararni 5 million dollarga baholagan.
Burger King‘ning o‘zi bu ayblovlarni yolg‘on deb atagan va burgerlarni xuddi suratdagidek qilishga majburmasligini aytgan. Biroq sud bahsni hakamlar hay’ati hal qilishi haqida qaror chiqargan.
Ushbu da’vo bo‘yicha sud majlisi qachonga belgilangani hali e’lon qilinmagan va tomonlar u boshlanmasdanoq kelishuvga erishishlari mumkin.
Avval ham shunga o‘xshash da’volar McDonald's, Wendy's va Taco Bell tarmoqlariga nisbatan ilgari surilgan. Ayni paytda bu kompaniyalarga nisbatan Nyu-York federal sudida taftishlar olib borilmoqda. Bu holatlarda ham arzchilarning har biri 5 million dollardan tovon puli talab qilmoqda.
