Janubiy Koreyaning akkumulatorlar uchun materiallar ishlab chiqaruvchi Ecopro Co. kompaniyasi aksiyalari narxi joriy yilda 919 foizga oshib ketdi. Bu kapitallashuvi 10 milliard dollardan kam bo‘lmagan kompaniyalar ichida eng katta o‘sish bo‘ldi.
Ushbu natija kompaniyaning sobiq raisi va bosh ijrochi direktori Li Don Chega ham katta boylik olib keldi. Bloomberg Billionaires Index ma’lumotlariga ko‘ra, Li va uning oilasi boyligi joriy yilda qariyb 4,5 milliard dollarga oshib, 4,9 milliard dollarga yetgan.
Bu muvaffaqiyat Li insayder savdolaridagi ayblovlar bilan kurashayotgan bir paytda yuz berdi. Ushbu ayblov natijasida u ikki yillik qamoq jazosiga hukm qilingan va kapital bozori haqidagi qonunni buzgani uchun 2,2 milliard von (1,7 million dollar) jarimaga tortilgan.
Ecopro aksiyalari o‘sishi ortida mamlakat fond bozorida ustunlik qiluvchi Janubiy koreyalik chakana investorlar turibdi. Elektr transport vositalari bilan bog‘liq aksiyalar savdosi hozirda avjida bo‘lib, avtomobil ishlab chiqarishda ishlatiladigan butlovchi qismlar yoki materiallarni yetkazib beruvchi kompaniyalar bu yil katta foyda olmoqda. Ecopro‘ning Samsung SDI Co. va SK On Co. kabi kompaniyalarga litiy-ionli batareyalarda qo‘llanuvchi katodlarni yetkazib beruvchi sho‘ba korxonasi – Ecopro BM Co. aksiyalari narxi ham 227 foizga oshgan.
2023-yil 2-chorakda Ecopro daromadi 2022-yilga nisbatan 64 foizga oshib, 2 trillion vonga yetgan. Kompaniya daromadining katta qismini Ecopro BM keltiradi.
Kambag‘al oiladan chiqqan va kechki kollejda biznesni boshqarish bo‘yicha tahsil olgan Li 1997-yilda qabul qilingan issiqxona gazlari chiqindilarini qisqartirish bo‘yicha Kioto protokolida ko‘zda tutilgan maqsaddan ilhomlanib, 1998-yilda Ecopro kompaniyasiga asos solgan.
Li 2022-yil mart oyida bir necha xodimlari, jumladan, o‘zi insayder savdosi bilan shug‘ullangani haqidagi ayblovlar ortida kompaniya bosh direktori lavozimidan ketgan. Avgust oyida mamlakat oliy sudi bergan bayonotda aytilishicha, Li muhim ma’lumotlarni sir saqlagan holda, Ecopro BM aksiyalari bilan savdo qilish uchun boshqa nomga ochilgan hisobraqamidan va farzandlariga tegishli hisobraqamlardan foydalangan. Buning ortidan u 1,1 milliard vonga yaqin pul ishlab olgan.
Li hozirda Ecopro‘ning eng yirik aksiyadori bo‘lib qolmoqda va taxminan 25 foizlik ulushiga ega. Kompaniya vakilining ta’kidlashicha, Li va uning oilasi kompaniya ustidan boshqaruvni saqlab qolish uchun minimal ulushga egalik qiladi.
