Dunyoning eng badavlat odamlari o‘ntaligiga kiruvchi tadbirkorlar 2023-yil yanvaridan beri jami yana 420,5 milliard dollarga boyishdi. Bundan Bloomberg Billionaires Index (BBI) ma’lumotlari darak bermoqda.
Tesla va SpaceX asoschisi Ilon Mask hamon sayyoramizning eng boy odami bo‘lib qolmoqda. Yil boshidan uning boyligi 98,4 mlrd dollarga ko‘paygan va hozirda 235 mlrd dollarni tashkil etmoqda.
2-o‘rinni qimmatbaho tovarlar ishlab chiqaruvchi LVMH kompanisi egasi Bernar Arno egallagan. Fransuzning boyligi 23,9 mlrd dollarga oshgan va hozirda 186 mlrd dollarni tashkil etadi. 3-o‘rinni Amazon asoschisi Jeff Bezos egallagan. Yil boshidan beri tadbirkor yana 55,4 mlrd dollarga boyigan va jami boyligi 162 milliardga yetgan.
Oracle kompaniyasi asoschisi Larri Ellison reytingning 5-pog‘onasidan 4-pog‘onasiga ko‘tarilgan. Uning boyligi yil boshidan beri 42,5 mlrd dollarga ko‘paygan va jami 134 mlrd dollarga yetgan. Reytingning beshinchi pog‘onasidan Microsoft asoschisi Bill Geyts o‘rin olgan. Yil boshidan beri tadbirkor 19,9 mlrd dollarga (jami boyligi 129 mlrd dollar) boyigan.
Sayyoramizdagi eng badavlat odamlar o‘ntaligiga, shuningdek, Google asoschisi Larri Peyj (umumiy boyligi 123 milliard dollar, yil boshidan beri 39,8 milliardga boyigan), Berkshire Hathaway xoldingi rahbari Uorren Baffet (121 milliard dollar, +13,2 milliard dollar), Google asoschilaridan biri Sergey Brin (116 mlrd dollar, +37 mlrd dollar), Microsoft bosh direktori Stiv Ballmer (114 mlrd dollar, +28,3 mlrd dollar) ham kirgan. O‘tgan oy reytingning 7-pog‘onasini egallagan Meta bosh direktori Mark Sukerberg reytingning 10-pog‘onasiga tushib ketgan. Hozirda uning jami boyligi yil boshidan beri 62,1 mlrd dollarga ko‘paygan va 108 milliard dollarga yetgan.
