Amerikalik milliarder, Microsoft bosh direktori Bill Geytsning aytishicha, avvallari uning ish jadvali juda tig‘iz bo‘lgan – unda bir daqiqa ham bo‘sh vaqt bo‘lmagan. Geyts hattoki tungi soat 2 da ham xodimlarini bezovta qilishi mumkin edi.
Biroq biznesmen boshqa bir amerikalik milliarder, Berkshire Hathaway bosh direktori Uorren Baffetning shaxsiy kundaligini ko‘rgandan keyin o‘ziga va xodimlariga biroz yengillik berishni o‘rgandi.
“Menda har bir daqiqa rejalashtirilgan edi va men buni nimadir qilishning yagona yo‘li deb hisoblardim. Uorren menga o‘z taqvimini ko‘rsatganini eslayman ... Unda hech narsa rejalashtirilmagan bo‘sh kunlar bor edi”, deb eslaydi Geyts intervyularidan birida.
Baffetning ish jadvali Geytsga muhim saboq berdi: “Siz o‘z vaqtingizni nazorat qilasiz... Ish jadvalingizning har bir daqiqasini band qilishingiz sizning jiddiyligingizdan dalolat bermaydi”.
“Men deyarli istagan narsamni sotib olishim mumkin, lekin vaqtni sotib ololmayman", deb aytgan o‘shanda Baffet Geytsga.
Baffetning mohiyatan “ko‘proq emas, balki aqlliroq ishlang” tamoyiliga asoslangan ushbu usuli aslida fan tomonidan ham qo‘llab-quvvatlanadi. 2014-yilda Stenford universitetida o‘tkazilgan tadqiqot natijalari shuni ko‘rsatdiki, xodimlar haftasiga 50 soatdan ortiq ishlaganda ularning samaradorligi keskin pasayib ketadi.
Tadqiqotga ko‘ra, haftasiga 70 soatgacha ishlaydigan odamlar noutbukda 55 soat ishlaydiganlar bilan bir xil hajmdagi ishni bajaradi.
Geyts Shimoliy Arizona universitetida so‘zlagan nutqida unga ish va shaxsiy hayot o‘rtasida muvozanatni topish uchun yillar kerak bo‘lganini aytgan.
“Sizning yoshda men ta’tillarga ishonmasdim. Men dam olish kunlariga ishonmasdim. Men bilan ishlagan odamlarning tanaffus olishi kerakligini o‘ylamasdim”, degan milliarder o‘z nutqida.
“Bu saboqni o‘rganish uchun mendek uzoq vaqt kutmang. O‘z munosabatlaringizni rivojlantirish, muvaffaqiyatlaringizni nishonlash va yo‘qotishlardan so‘ng oyoqqa turishga shoshilmang. Sizga kerak bo‘lganda tanaffus oling. Atrofingizdagi odamlar yengillikka ehtiyoj sezganda, ular bilan qattiqqo‘l bo‘lmang”, deb qo‘shimcha qilgan Geyts.
