Xitoyning muammoli qurilish kompaniyasi Evergrande Group aksiyalari narxi Gonkong fond birjasidagi savdolarda 23 foizga tushib ketdi. Ommaviy axborot vositalari tomonidan kompaniyaning o‘z qarzlarini restrukturizatsiya qilish bo‘yicha yig‘ilishni keyinga qoldirish haqidagi bayonoti buning sababi sifatida ko‘rilmoqda. Kompaniya, shuningdek, o‘zining Hengda Real Estate bo‘linmasiga qarshi tergov borayotgani sababli qarzini restrukturizatsiya qilish uchun hali yangi obligatsiyalar chiqara olmasligini aytgan.
Bu Evergrande aksiyalarining sentabr oyida ketma-ket ikkinchi pasayishidir. O‘tgan haftada kompaniyaning bir necha xodimi politsiya tomonidan hibsga olingani haqidagi xabardan so‘ng aksiyalar 25 foizga qadrsizlashgan. Kompaniyaning xususiy kapitalni boshqarish bo‘limi rahbari Du Lyan va yana bir necha kishi hibsga olingan. Politsiya ayblovlarning mazmunini oshkor qilmagan, hibsga olinganlarning aniq soni ham ochiqlanmagan.
Kompaniya atrofidagi inqiroz 2021-yildan beri davom etmoqda. O‘shanda xoldingning jiddiy moliyaviy muammolari haqida ma’lum bo‘lgan. Kompaniyaning qarzi 328 milliard dollarga yetgan. 2022-yilda Evergrande o‘zining qarz majburiyatlari bo‘yicha texnik defoltni boshdan kechirgan va kompaniyani restrukturizatsiya qilish jarayoni hali ham davom etmoqda.
