Deloitte xalqaro konsalting va audit kompaniyasi e’lon qilgan Italian Hospitality Market hisobotidan Italiyada 32000 dan ortiq mehmonxona borligi ma’lum bo‘ldi. Bu borada mamlakat Yevropada birinchi o‘rinni egalladi.
2022-yilda Yevropaning turli mamlakatlarida mehmonxonalar sektoriga kiritilgan investitsiyalarning taqsimlanishiga kelsak, Italiyaning bundagi ulushi 1,6 milliard yevroni tashkil etgan. Bu Yevropada ushbu sektorga kiritilgan jami investitsiyalarning 15 foizini tashkil qiladi.
Deloitte tomonidan so‘ralgan sarmoyadorlar orasida Italiya mehmonxona sektoriga investitsiya kiritmoqchi bo‘lganlar ulushi rekord daraja – 89 foizni tashkil qilgan.
Hisobot sarmoyadorlarning Italiya mehmonxonalar sektoriga sarmoya kiritish istagini ko‘rsatgan. Ulardan 60 foizi Italiya shimolidagi, yana shunchasi mamlakat markazidagi va 46 foizi janub hamda orollardagi mehmonxonalarga sarmoya kiritish istagini bildirgan.
Bundan tashqari, sarmoyadorlarning mehmonxona joylashuviga ko‘ra ham istaklari o‘rganilgan: ularning 88 foizi Italiyaning asosiy shaharlaridagi, 67 foizi dengiz sohilidagi, 38 foizi esa ko‘llar bo‘yidagi mehmonxonalarga sarmoya kiritish istagini bildirgan bo‘lsa, 25 foizi tog‘larda joylashgan, 17 foizi qishloqlardagi va 8 foizi mamlakatning ikkinchi darajali shaharlaridagi mehmonxonalarga sarmoya kiritishga tayyorligini aytgan.
